Noreg skal innføra EU sitt nye avløpsdirektiv i løpet av nær framtid. Avløpsdirektivet inneber at avløpsvatnet frå tettstadar større enn 1000 PE (personekvivalentar) skal gjennomgå sekundærreinsing.

Per i dag er kring 19000 personar i Stord-samfunnet tilknytt kommunalt avløpsnett i «tettstaden Stord». Alt kommunalt avløpsvatn i heile kommunen, frå Fjellgardane og Kyvik i aust til Dyvik i vest, skal pumpast fram til planlagt nytt sekundærreinseanlegg på Skjersholmane.

I tillegg til nytt reinseanlegg, skal det leggjast ned 25 kilometer med nye avløpsrøyr og det skal etablerast 16 nye avløpspumpestasjonar. Prosjektet med røyr og avløpspumpestasjonar blir splitta opp i prosjektpakkar med tilhøyrande budsjett og framdriftsplanar. Arbeidet med nytt sekundærreinseanlegg og tilhøyrande røyr og avløpspumpestasjonar er starta og er planlagt ferdigstilt til januar 2030.

Der det høver, vert etablering av nye avløpsanlegg sett i samanheng med rehabilitering av anna kommunalt VA-anlegg.

Investeringskostnadane med innføringa av det nye avløpsdirektivet vert finansiert med avløpsgebyret abonnentane betalar.